les chonq clotiers

Tournai feseot mès èspérances,
V'la qu'on m'dit : "Te dos t'imbêter,
Et si tu veus des jouissances,
Ch'est à Paris qu'il faut aller.
Là, te riras, là te vèras
Tous les farceurs, comédiens, canchonniers.
Faut quitter Notèr-Dame
Avec sès chonq clotiers."

Mi j'pinseo qu'ch'èteot là m'n'affaire,
A Tournai j'n'aveos pus d'plaisis ;
Un jour je vas trouver m'ma mère,
J'ôte èm'casquète et pus j'li dis :
"Ej'veu partir, ej'm'in vas vîr
Des teinturiers qui saittent leus métiers,
J'veu quitter Notèr-Dame
Avec sès chonq clotiers."

Cèl'pauf feime éteot tout'saisie
(Les mèr's aim'tent trop leus garcheons).
V'là qu'èl me dit : "Jour de ma vie !
Quoisque ch'est qui t'manque à t'maseon ?
Te fés l'lindi, te fés l'mardi,
A l'processieon te fés huit jours intiers ;
Quoi ! te quit' Notèr-Dame
Avec sès chonq clotiers."

L'lind'main j'approcheo del frontère
In voiture avec ed's inglès ;
J'aveo toudis l'tiète al portière,
Ces messieurs éteot' ingélés ;
Tout à n-un queo, je m'sins l'cur greos ;
In m'alongeant sur les point'ed'mes pieds,
J'vèyo pus Notèr-Dame
Avec sès chonq clotiers.

Je n'sais pas bin l'longeur del'route,
Je dormeo, j'éteo fin contint
Un inglès qui buveot la goutte
M'dit com' cha el' lind'main matin :
"Vaô, Taornégien, vaô savoar bien
Qué vaô réfiez, vaô taojors, vaô chantiez :
Vaô taojors Notèr-Thème,
Avec sès chonq clotiers."

L'premier qui m'a dit èn' parole
Quand j'éteo intré dins Paris,
Ch'â-té l'neveu d'Môsieu Dugnole,
Com ç'grcheon i éteot surpris !
I' me r'luqueot, i' me r'wetieot,
Tout à n-un queo, quand i m'a bin r'wétié,
I' crie :"Viv' Notèr-Dame
Avec sès chonq clotiers."
Le texte complet de cette chanson comporte quatorze couplets.