David Vincent
Administrateur du forum
Nombre de messages : 123
Age : 61
Pays + Ville : Tournai ( Belgique )
Emploi : Administration
Loisirs : Cyclisme, cinéma, musique, voyages
Date d'inscription : 05/12/2006
 |  Sujet: Ch'est ainsin dins no ville  Sam 20 Jan - 9:12 | |
| 
Et à Grand-père aussi que j'vas béteot m'marier.
Mo Dieu, m'pétit garcheon, cha nous fét bin plési,
Si on s'plait inter vieux, on aime les jeonn' aussi.
A t'baptêm' te bréieos tins, j'm'in rappelle acor,
Pindant qu'tes larm' queureott', mi t'm'arroséos bin fort.
T'ma mère elle en riéot
Pindant Grand-père cantéot :
Ch'est ainsin dins no ville
Te n'saréos pos l'canger
Prinds les garcheons, les filles,
Tout's tiêt's sous l'mèm' bonnet !
D'aussi leong qu'j'me souvienn', t'éteos ein p'tit bringand,
Te n'aveos pos t'parel pou jouer tous les plans
Ein' feos t'mamère ell' dit : "Grand-pèr' tout tranquill'mint
T'ira quère à l'école, à midi, no gamin."
Mi, comm' j'éteos in r'tard, ej pass' pa l'rue Clercamps,
J'te veos sonner aux port's et bin vit' foute el camp.
T'mamère a berteonné,
Més mi j'li ai canté :
Ch'est ainsin dins no ville
Te n'saréos pos l'canger
Prinds les garcheons, les filles,
Tout's tiêt's sous l'mèm' bonnet !
Pus tard, t'n'as pos eu d'chance, t'a fallu êt' soldat,
Dins l'temps ch'teot eine affair', à c't'heure ch'est pus rien d'cha !
Dins ein coin de m'commot' j'aveos bin mis d'côté
Ein'pétit' noirte loque et te d'as profité !
T'nous in récompinsas, braf' pétit garcheonnal
L'jour que te rapportas tes galeons d'caporal !
Et comm' Grand-père brayeot,
Ch'est ta qui li canteos :
Ch'est ainsin dins no ville
Te n'saréos pos l'canger
Prinds les garcheons, les filles,
Tout's tiêt's sous l'mèm' bonnet !
A l'occasieon d'tes noces te n'aras pos d'cadéau,
Mais te n'y perdras pos, queusis ichi c'qu'i t'féaut;
Avé Grand-père hier nous l'avons décidé
Et j'sus certain', garcheon, qu'te vas ête inchanté,
Te vos ceull' vielle horloch', j'l'ai toudis counnue là
Ell' vient d'vos vieux parints, si t'veux che s'ra pour ta.
Te berch'ras tes infants
Au tic-tac in cantant :
Ch'est ainsin dins no ville
Te n'saréos pos l'canger
Prinds les garcheons, les filles,
Tout's tiêt's sous l'mèm' bonnet | |
|
